O programa do San Martiño trae á vila catro días con actividades variadas

O Concello de Bueu pecha o seu programa de festas populares coa celebración do San Martiño que, seguindo a dinámica do proxecto das Freguifestas que se levou a cabo nas parroquias, contará cunha programación pensada para todos os públicos desde o 8 ata o 11 de novembro. Audiovisual, xogos tradicionais para toda a familia, deporte, castañas e música son a aposta da concellería de Cultura por unhas festas sostibles.

A vila de Bueu foi protagonista a comezos do outono da gravación do novo programa de Televisión de Galicia «Anacos de Vida» que se emitirá o vindeiro sábado 9 de novembro na canle pública. O día anterior, ás 20:30 horas, o Centro Social do Mar acollerá unha pre-estrea deste novo produto audiovisual. No mesmo participaron mulleres e homes tanto a título persoal coma en representación de diferentes colectivos, e que xunto ao alumnado do Ceip A Pedra e Arturo Cidrás -que son protagonistas polas súas historias persoais- fan un percorrido a través da memoria gráfica bueuesa polo noso pasado.

O alumnado de A Pedra participa en varias fases do programa
O autobús de época do programa percorreu diversas localizacións da nosa vila

A mañá do sábado, o recinto de A Estacada acollerá uns campionatos de trompos e de bolas cos que se pretende fomentar a convivencia interxeracional para recuperar unha das actividades que máis éxito tiñan hai anos. Será a partires das 11:00 horas, polo que se anima á veciñanza de Bueu a que vaian recuperando os seus antigos xogos ou que acudan a mercalos para cumprir co refrán de «polo San Martiño trompos ao camiño».

A tarde acollerá a XXIV edición da Carreira Pedestre de San Martiño organizada polo Concello de Bueu en colaboración co Club Atletismo Corredoiras. As diferentes categorías competirán desde as 17 horas nas rúas da avenida de Montero Ríos ata finalizar coa proba senior.

Cartaz da proba

Para finalizar o programa festivo deste sábado a troula trasládase á carpa instalada nas Lagoas onde terán lugar as actuacións musicais dos grupos Betty & The Amish e Jinetes del Trópico a partires das 21.00 horas. Os primeiros gustan de estilos coma o funky, swing, blues e soul de tódalas épocas, cun son elegante e cunha voz profunda.

Despois será o turno de Jinetes del Trópico cun estilo de mestizaxe que eles definen como cumbia, reggaeton antimachista e punk tropical, e que veñen de tocar no verán en festivias como Atlantic Fest, Revenidas e Armadiña Rock.

O domingo 10, véspera de San Martiño, a carpa de As Lagoas contará pola mañá e pola tarde con xogos populares entre as 11:30 e as 13:00 horas e as 17:00 e as 18:30 para que goce toda a familia. Ademais para a cativada haberá inchables.

O Saloon acomapañará ao cocodrilo no interior da carpa e serán de balde

O día finalizará coa verbena a cargo da orquestra local Distrito 7, que fará bailar a xente de tódalas idades ao igual que fixo durante todo o verán nas freguifestas.

Distrito 7 promete facer bailar a todo o mundo

O día de San Martiño seguirán os xogos populares e os inchables na carpa, aos que haberá que engadir un tradicional magosto popular desde as 17 horas previo a que ás 20.00 h poña o broche de ouro ás celebracións a Orquestra Marbella, que volve dous anos despois a actuar nas festas patronais de Bueu.

Marbella volve a Bueu onde contan cun gran número de seguidoras

Ademais desta programación do Concello, tamén haberá as tradicionais misas ás 12 horas o domingo cantada pola Coral Polifónica Bueu e o luns coa Coral Marusía, ademais da mostra de fotografías antigas no adro organizada pola Asociación Cultural Santos Reis.