Agora en Bueu
Imáxes de actualidade
👻 🎃 O Parque Ramal dos Galos de Bueu viviu o pasado sábado unha xornada terrorífica coa celebración do Samaín, onde houbo obradoiros, contacontos e túnel do terror.
Así foi a tarde na que se animou a participar gran cantidade de público tanto miúdo como persoas máis maiores.
Unha xornada para compartir coa familia e amizades!
Nov 2
🫂 Este domingo celebramos nos Xardíns do Antigo Cemiterio o acto laico polo Día de Defuntos, que organizamos dende o Concello de Bueu e co que quiemos lembrarnos de todas as persoas que xa non están con nós, tamén de forma especial coas que perderon a vida no mar.
No acto participaron a poeta local Míriam Ferradáns e a violinista Lía Vilas, ademais do alcalde, concelleiros e concelleiras e a veciñanza.
Nov 2
📽️ Este xoves vivimos momentos moi emotivos na inauguración do ciclo de cinema mudo "O poder da imaxe", coa estrea da película "Evocare. Canto de emigración" de Pepe Coira e a actuación da Orquesta Clásica de Vigo.
🗣️ Félix Juncal, alcalde da vila, salientou que é unha proposta que nace dende o Concello de Bueu para reivindicar o silencio e os ritmos máis demorados e para fortalecer os vínculos entre as persoas.
O ciclo, que é de balde, continuará nas próximas semanas con diversas propostas que vos convidamos a coñecer.
Toda a info na web (ligazón na BIO)
Out 30
🍂 🎉 Chegan as Festas de San Martiño
O Concello de Bueu organiza un amplo programa de actividades para celebrar as Festas do San Martiño, que se desenvolverán entre o 7 e o 12 de novembro. Música, magosto, xogos tradicionais e inchables, constitúen as apostas do Concello para unhas festas variadas e diversas, que seconcentrarán na súa maioría na carpa que nesta ocasión se situará na zona exterior do Centro Social do Mar, debido ás obras do Parque Urbano Lugrís.
Hoxe tivemos a rolda de prensa de presentación da programación.
Podedes consultala xa na nosa web (ligazón na BIO)
Out 29
🫂 O pobo de Bueu mostrou o seu apoio e solidariedade coas vítimas do accidente ferroviario acontecido na localidade toledana de Urda.
Dende o Concello de Bueu convocouse este mércores pola tarde unha concentración silenciosa diante da Casa Consistorial á que se sumaron o alcalde, concelleiros e concelleiras da corporación municipal e veciñanza bueuesa.
Félix Juncal, alcalde da vila, lanzou unha mensaxe de ánimo para as persoas e familiares que "están pasando por uns momentos tan terribles que marcarán as súas vidas".
Out 29
🏆 ACTO DE ENTREGA DOS PREMIOS JOHAN CARBALLEIRA DE POESÍA E XORNALISMO
▪️ O Concello de Bueu celebrou este sábado, 24 de outubro, o acto de entrega dos Premios Johan Carballeira de Poesía e Xornalismo, que tivo lugar ao mediodía na Sala Multiusos do Centro Social do Mar, e ao que asistiron os dous gañadores.
▪️ Nel, Jacobo Paz Limia, gañador na categoría de poesía, e Manuel Vilas López, na de xornalismo, recibiron unha cerámica de Carballeira deseñada para a ocasión pola artista Cavalinho do Demo.
▪️ O acto contou coa actuación da poeta e performer Nuria Vil, quen presentou o seu espectáculo desobediensia, que é unha vindicación do desexo.
Tedes a info completa na nosa web (ligazón na BIO)
Out 24
📽️ CICLO DE CINEMA MUDO `O PODER DA IMAXE`
▪️ O Concello de Bueu presenta O poder da imaxe, un ciclo de cinema mudo en catro sesións co que inaugura a programación cultural de outono. Comezará o xoves 29 de outubro e continuará os xoves 5 e 12 e o sábado 21 de novembro, sempre ás 20.00 h, no auditorio do Centro Social do Mar de Bueu. A entrada é de balde.
▪️ O ciclo recupera en pantalla grande un patrimonio cinematográfico esencial, nun percorrido que vai do melodrama lírico de Murnau á comedia social de Chaplin, pasando pola mirada de Ozu sobre a infancia e a familia. É unha programación pensada para todos os públicos.
▪️ «Este proxecto nace da necesidade de abrir un espazo para a reflexión, de devolverlle protagonismo ao silencio e ás cousas aparentemente máis sinxelas, propias dunha época menos complexa na que as relacións persoais eran máis naturais e espontáneas. Vivimos nun momento no que todo é superficial e efémero e mesmo desaparece a capacidade de análise, de crítica e de compromiso social», explica o alcalde de Bueu, Félix Juncal Novas.
Toda a info xa na nosa web (ligazón na BIO)
Out 23
🏆 Dende o Concello de Bueu queremos darlle os parabéns a varias nenas de Bueu que se proclamaron subcampioas do Campionato Galego de Ximnasia Rítmica celebrado a pasada fin de semana, na categoría de infantil base, polo que obteñen o pase directo ao Campionato Nacional, que terá lugar en Cartagena o próximo mes de novembro.
🤸♀️ O conxunto infantil, integrado no Club Rítmica In Mare, está conformado por Sara Cerqueiro Cosío, Nerea Cerqueiro Cosío, Erika Simes Andrade, Lola Curra Moital (todas de Bueu), e Vera Martínez Martínez (Cangas).
Unha vez máis, seguimos a ver que o deporte en Bueu se move!
Out 22
🏆 A corporación municipal de Bueu organizou este venres, 16 de outubro, unha despedida e agradecemento a José López Moldes ‘Josecho’, quen exerceu de párroco da vila durante os últimos nove anos. O acto tivo lugar no salón de plenos da Casa do Concello e nel participaron o alcalde Félix Juncal, así como outros concelleiros e concelleiras dos grupos políticos municipais.
Toda a info na web (ligazón na BIO)
Out 16
🎶 🌊 O Centro Social do Mar acolleu este xoves un sesión musical do proxecto "A música nos oficios e labouras do noso mar", que organizou Afamo Morrazo coa participación do músico Xavier Blanco.
A actividade, que financia o GALP Ría de Pontevedra, é un percorrido polas músicas e cantidas das xentes do mar e unha reivindicación dos instrumentos cotiáns e improvisados.
Out 16
👌 Carmen García, concelleira de cultura e normalización lingüística, visitou este mércores ao alumnado do "Curso de introdución á lingua e cultura galegas", que se imparte no IES Johan Carballeira co apoio da Secretaría Xeral de Política Lingüística da Xunta de Galicia.
☑️ O curso é unha formación de vinte horas que pretende promover o emprego do galego e o coñecemento da cultura galega en distintos ámbitos da poboación e en todos os contextos da sociedade, dirixíndose particularmente aos novos galegos e galegas provenientes do exterior.
✍️ Dende o Concello recolléronse as demandas das persoas participantes co fin de implementar melloras neste eido.
Out 15
📚🤹♀️ Este martes puidemos gozar do espectáculo "Circo na biblioteca" de Dani Blanco na Biblioteca Municipal Torrente Ballester de Bueu.
Nesta actividade, que se insire no programa "Outono de contos", atopamos contos, malabares e moito humor.
Out 14
🤸🚶♀️ O Centro Social do Mar acolleu este venres pola mañá o acto de presentación oficial das ximnasias deportivas municipais que arrancan para a semana. Félix Juncal, alcalde da vila, participou na xornada á que asistiron veciños e veciñas que van comezar as actividades tanto no Centro Social do Mar como no Pavillón Municipal Pablo Herbello de Bueu.
👌 En total, serán 325 persoas en trece grupos tanto en horario de mañá como de tarde, aos que se unirán os das parroquias de Cela e Beluso e o lugar de Meiro, ademais das clases específicas para as persoas afectadas polo Parkinson. Todos eles suman preto de cincocentas prazas con clases que se imparten de balde.
Toda a info xa na nosa web (ligazón na BIO)
Out 9
📢 Bueu estivo presente na concentración pola vivenda celebrada o pasado sábado en Cangas e na que participou veciñanza de toda a comarca.
Dende o Concello de Bueu apoiamos o acto no que estiveron presentes os edís Silvia Carballo e Alberto Moital. Xa dende o consistorio iniciamos accións dende hai anos para contar con vivenda pública, unhas demandas que frutificaron nun acordo coa Xunta de Galicia que vai permitir a construción inminente dunha trintena de vivendas no municipio.
Out 5
🚶♀️🩷 Este domingo celebrouse a Marcha Fina Acuña organizada por Adicam e que tivo unha das súas saídas dende a nosa vila.
O alcalde participou, xunto a outros concelleiros e concelleiras da corporación, no acto da saída e na andaina que culminou en Cangas coa reivindicación de maior coidado e investigación para as persoas con cancro.
Grazas a todas as persoas que enchestes as nosas rúas dunha gran marea rosa!
Out 5
O Concello de Bueu colabora un ano máis coa Asociación de Enfermos de Artrite de Pontevedra (ASEARPO), e por iso este xoves, 1 de outubro, se iluminou a Casa Consistorial de cor verde, coincidindo co Día Nacional da Artrite.
O acto de encendido simbólico tivo lugar ás 21.00 h e nel participaron concelleiros e concelleiras da corporación, así como membros da asociación pontevedresa.
Esta campaña organízase co obxectivo de sensibilizar e informar á poboación sobre a artrite reumatoide, artrite psoriásica, artrite idiopática xuvenil, espondilite anquilosante e espondiloartrite. A iluminación de cor verde é, pois, unha homenaxe para as persoas que padecen estas enfermidades, e ten como finalidade darlles máis visibilidade xa que seguen sendo patoloxías descoñecidas pola maior parte da cidadanía.
Out 1
