Presentación libro: «Sen piedade», de Pedro Feijoo

A Libraría Miranda organiza o venres 22 de xuño, ás 21.00 horas, a presentación do libro Sen piedade, de Pedro Feijoo, publicado na Editorial Xerais. O acto terá lugar na Biblioteca Municipal Torrente Ballester e nel intervirán o crítico Ramón Rozas e o autor.

SINOPSE: Unha novela escrita a tumba aberta. Sen coidado nin precaución, sen tregua, sen límites. Sen piedade.
Podería contar moitas cousas daqueles dous días. Pero supoño que agora o único que importa é que Gordo era o meu mellor amigo, e que eu estaba fodido coma nunca. Porque ela xa non quería saber nada de min. E eu queríaa, maldita sexa, queríaa. Por riba das cidades, por riba das autoestradas, por riba do mar e das estrelas, eu estaba tolo por ela… Pero agora non parecía disposta a escoitarme. E Gordo comprendeuno. «Neno, o que ti necesitas é unha boa festa», dixera. E así foi como decidimos tomar prestado o coche do vello, un impresionante Dodge Charger do 68, e botarnos á estrada nunha viaxe feroz. A tumba aberta. Sen coidado nin precaución, sen tregua, sen límites. Sen piedade.