FICBUEU: Festa de peche

Os actos de peche do FICBUEU 2018 darán comezo ás 20.30 horas do sábado 15 de setembro nos exteriores do Centro Social do Mar cun concerto da Banda de Música Artística de Bueu, que interpretará bandas sonoras de grandes clásicos do cinema, nunha actuación que se encadra  no plan Pontegal da Deputación de Pontevedra.

Ás 21.30 horas arrincará no auditorio do Centro Social do Mar a Gala de Clausura, na que se entregarán os galardóns ás curtametraxes premiadas e se volverán proxectar as gañadoras dos premios principais. Ao acto acudirán as e os cineastas que optan aos premios, así coma distintas autoridades e persoeiros da industria cinematográfica. A cerimonia estará conducida polo actor César Aldea, acompañado por Severiano Casalderrey ao piano.

Ao remate, as persoas asistentes terán acceso á Festa de Clausura, un encontro entre organización, convidados e público que se desenvolverá no segundo andar do Centro Social do Mar para poñer o ramo ao 11º Festival Internacional de Curtametraxes de Bueu.

Para esta xornada, a Asociación Cultural Alfombras de Corpus de Bueu engalanará o acceso ao edificio cunha alfombra floral, obra de arte efémera coa que lles daremos a coñecer ás e aos visitantes unha das tradicións máis arraigadas na nosa vila.