Ciclo de cinema galego: Negro Púrpura

O Cineclub Bueu programa durante este mes de maio o Ciclo de Cinema Galego, que traerá á vila diversos títulos da nosa cinematografía actual que se poderán visionar e que estarán acompañados de coloquios cos membros do equipo directivo. Así, o 6 de maio terá lugar ás 21.00 horas a proxección de «Negro Púrpura» de Sabela Iglesias e Adriana P. Villanueva, que se poderá ver no Centro Social do Mar. O custe de entrada é de 2.00 € para soci@s e de 4.00 € para non soci@s.

SINOPSE: «Negro Púrpura» retrata un dos lugares de produción a nivel mundial de claviceps purpurea: Galicia. Este fungo alucinóxeno, que brota dos cereais, ábrenos as portas dunha historia tan curiosa, sorprendente e descoñecida como importante no devir da cultura e a economía do territorio ao longo do século XX. Dende os campos de centeo ata as multinacionais e a CIA; dende as pragas medievais, pasando pola medicina popular, ata o LSD. Historias que nos deixan un regusto amargo a pan de centeo, historias que repercuten traspasados os océanos.