Arranca en Bueu o programa formativo da IXP Ribeiras do Morrazo

Este venres 22 de marzo comezará nas instalacións da biblioteca de Beluso de Bueu unha nova edición do programa formativo “PROFESIONALIZACIÓN E DESENVOLVEMENTO DA VITICULTURA NA IXP RIBEIRAS DO MORRAZO (2019)” de 71 horas lectivas organizado polo GDR Pontevedra Morrazo. O contido temático da sesión formativa deste venres é de carácter introdutorio e versará sobre as boas prácticas, a responsabilidade social e a sustentabilidade na vitivinicultura e os aspectos normativos para a xestión da viña e a adega, controis etc dentro da IXP . A sesión terá unha duración de 4 horas de 16:30h. A 20:30h.

Dende 2017, o Grupo de Desenvolvemento Rural Pontevedra Morrazo, que xestiona a medida Leader 2014-2020, está a desenvolver un programa formativo para a profesionalización e desenvolvemento da viticultura na indicación xeográfica protexida Ribeiras do Morrazo.

Nos anos 2017 e 2018 realizáronse accións formativas diversas orientadas a reforzar o empoderamento do sector de viticultores e adegueiros da zona comprendida na IXP Ribeiras do Morrazo, así como a súa profesionalización e capacitación técnica, fortalecendo deste xeito á propia figura ou selo de protección da calidade.

Nesta anualidade 2019, preténdese continuar a formación cunha proposta que afonda na sustentabilidade e boas prácticas na viticultura e enoloxía, con referencias a modelos de viticultura integrada e/ ou ecolóxica e explorando actuacións de carácter colaborativo entre as propias IXP de viño de Galicia e de funcionamento cooperativo.

A proposta de contidos didácticos para a IXP Ribeiras do Morrazo a desenvolver durante o período contemplado (marzo a xuño de 2019) contempla 16 accións formativas (13 xornadas formativas no territorio da IXP e 3 visitas temáticas fóra) cunha duración total de 71 horas lectivas.

Os cursos contemplados no plan formativo son totalmente gratuítos para os seus participantes.

CronogramaIXPRibeirasMorrazo

Máis información:

695333087

www.gdrpontevedramorrazo.eu