O Concello abre o prazo para que a hostalaría solicite envases respectuosos co medio ambiente

• A iniciativa, que parte das concellarías de promoción económica e da de medio ambiente, pretende apoiar o sector e, ao mesmo tempo, reducir o uso de plásticos
• As persoas responsables dos locais hostaleiros disporán ata o 20 de abril para presentar a solicitude a través do Rexistro Xeral

O Concello de Bueu realizará un reparto de envases respectuosos co medio ambiente entre a hostalaría bueuesa, unha iniciativa que parte das concellarías de promoción económica e de medio ambiente. Precisamente, os locais interesados en contar con estes envases deberán entregar a solicitude a través do Rexistro Xeral antes do 20 de abril, e na que deberán indicar o número que precisan de cada un dos recipientes de cara a que o Concello faga o reparto.

Este proxecto nace cun duplo obxectivo: dunha banda, contribuír a reducir os plásticos e a fomentar produtos de compra verde, que sexan respectuosos medioambientalmente e que a cidadanía poderá depositar no colector azul destinado a papel e cartón; doutra banda, axudar a un dos sectores económicos máis afectados con motivo da pandemia da Covid-19.

Dende o goberno local “tentamos axudar a un dos sectores máis damnificados por esta crise e que na actualidade está tendo gastos derivados da mesma”, apunta Silvia Carballo, edil de promoción económica e turismo, quen avanza que se continúa traballando na tramitación de liñas de axudas para a hostalaría e os demais negocios con perdas. Xosé Leal, concelleiro de medio ambiente, indica que “se trata tamén de reducir os plásticos, promovendo políticas transversais en todas as accións do goberno para o cumprimento dos obxectivos da Axenda 2030”.

Con esta iniciativa, o Concello de Bueu busca adaptarse á futura Lei de Residuos e Solos Contaminados, pendente de aprobación, e que establece a obriga de limitar os produtos de plástico dun só uso tales como vasos para bebidas (incluídos tapas e tapóns) e os recipientes para alimentos. Así mesmo, a administración cumpre coa compra pública verde, pola cal se deberán adquirir produtos reutilizables e reparables, e materiais facilmente reciclables. Con iso preténdese contribuír a minimizar o impacto dos residuos sobre o medio ambiente, o cambio climático e o lixo mariño.