O Concello de Bueu e a Comunidade de Montes de Beluso crearán un parque forestal en Cabo Udra

• O proxecto insírese no marco das subvencións destinadas á mellora dos montes convocadas pola Deputación de Pontevedra

O Concello de Bueu e Comunidade de Montes Veciñais en Mancomún de Beluso crearán un parque forestal en Cabo Udra, actuación que se insire no marco das subvencións destinadas á mellora dos montes convocadas pola Deputación de Pontevedra.

Estas subvencións constan de dúas liñas. A primeira vai destinada á redacción de proxectos de parques forestais subvencionados ata un máximo do 70 % do seu custo e a segunda refírese á execución das actuacións contempladas nos proxectos xa redactados.

O ano pasado, o Concello solicitara a subvención para a redacción dun proxecto de parque forestal en Cabo Udra e nesta convocatoria levarase a cabo a primeira fase da execución do mesmo, cuxo orzamento ascende a 55.558,67 €. O obxectivo é, pois, que este espazo sexa de recreo libre e público, con valores naturais, culturais e paisaxísticos únicos e que merecen ser promocionados e conservados.

O proxecto farase en dúas anualidades e inclúe a mellora e restauración dos valores naturais e forestais (conservación da masa forestal e do mato atlántico e diversificación de usos mediante recuperación de pasteiros naturais), a prevención e defensa contra incendios forestais (área de defensa verde para a protección de zonas edificadas de uso residencial e na Aula da Natureza de Cabo Udra, e control selectivo do mato nas zonas de maior tránsito e uso público), posta en valor dos elementos patrimoniais, culturais e paisaxísticos (protección e valorización de xacementos arqueolóxicos e elementos paisaxísticos), revitalización de elementos sociais e zonas de uso público (acondicionamento e mantemento da rede de sendeiros e do entorno do manancial de Barcelo e creación de fonte), e mellora de sinalización e interpretación dos valores do parque forestal (inclusión de paneis informativos e mesa panorámica no miradoiro).