O Concello de Bueu conmemora un 25 N, Día Internacional Contra as Violencias Machistas, adaptado á Covid-19
- Ana Isabel Otero, concelleira de igualdade, repartiu máscaras e libros polos colexios e institutos da vila, acompañada doutros membros do goberno local
- Mañá está programada unha concentración silenciosa ás 12.00 h, e o Concello difundirá nas redes sociais un vídeo de lecturas contra o machismo na voz de concelleiras e concelleiros da corporación
O Concello de Bueu organiza esta semana unha serie de actividades que reivindican o 25 de Novembro, Día Internacional Contra as Violencias Machistas, e que se adaptan ás restricións establecidas por mor da Covid-19. Así, este martes, Ana Isabel Otero, concelleira de igualdade, acudiu aos seis colexios e institutos da vila bueuesa para repartir máscaras que se realizaron con motivo desta efeméride co lema de “O machismo mata”, e que se dirixen ao alumnado e ao profesorado. Tamén se entregaron exemplares do libro O abecedario na maleta, unha biografía de Matilde Bares adaptada á cativada cos textos de Polo Correo do Vento e as ilustracións de Tania Solla. Otero aproveitou as visitas para coñecer tamén os proxectos nos que están traballando nos centros educativos con motivo desta data, entre os que están a elaboración de vídeos ou podcasts.
Así mesmo, este mércores, está programada unha concentración silenciosa na memoria das mulleres asasinadas polas violencias machistas, que terá lugar ás 12.00 h diante da Casa Consistorial, e na que participará a corporación municipal. Dende o Concello anímase á cidadanía a sumarse a este acto, no que se deberán respectar todas as medidas de seguridade, como o uso obrigatorio da máscara e o mantemento da distancia interpersoal.
Outra das iniciativas é a publicación nas redes sociais do Concello dun vídeo de lecturas contra o machismo, no que se recollen poemas e fragmentos de obras literarias que falan da violencia e da necesidade do feminismo na voz das concelleiras e concelleiros da corporación.
A estes actos sumouse a campaña da Xunta de Galicia no marco do programa #AgresionOff 2020 da semana pasada, e a declaración institucional que aprobou a corporación no pleno ordinario do mes de outubro.
Entrega material no CEIP Montemogos de Beluso Entrega de material no CEIP Torre Cela Entrega de material no IES Illa de Ons Entrega material no CPR Virxe Milagrosa Entrega de material IES Johán Carballeira