O CEIP Torre Cela inaugurou unha biblioteca inclusiva e creativa

• O espazo terá un padriño moi especial, o recoñecido artista bueués Luís Davila ‘O Bichero’
• Ao acto asistiron Xosé Leal, concelleiro de cultura e ensino, e Carmen Pomar, Conselleira de Educación da Xunta de Galicia

O Ceip Plurilingüe A Torre de Cela acolleu este luns, 17 de febreiro, a inauguración da nova biblioteca escolar que nace co obxectivo de ser un espazo de aprendizaxe, así como de creación e experimentación. Ao acto asistiron Xosé Leal, concelleiro de cultura e ensino de Bueu, Elena Estévez, voceira do PP de Bueu, Carmen Pomar, Conselleira de Educación, Miriam Area, directora do centro educativo, amais do profesorado e o alumnado deste.

O de hoxe era un día especial e moi agardado por toda a comunidade educativa, pois marca o punto de inicio para comezar a traballar co modelo de biblioteca inclusiva, cunha atención primordial á exploración da parte máis creativa e artística.

Para esta reforma integral, o centro recibiu unha axuda por parte da Dirección Xeral de Centros da Xunta de Galicia. Nela hai diversas zonas que fomentan a relación entre os nenos e as nenas e promoven a creatividade. Así, ao espazo de literatura súmase o de bricolaxe, o de robótica, o de reciclaxe, o muro de lego, a área de xogos, as butacas de lectura, o recanto da arte… A radio escolar, sita no andar segundo, tamén forma parte da biblioteca e nela o alumnado realiza entrevistas, cuñas publicitarias, programas temáticos. Segundo recoñecen “a radio axúdanos a expresarnos mellor”.

O acto inaugural e a explicación dos diversos espazos levouse a cabo por parte dun grupo de rapazas e rapaces, que definiron a biblioteca como “un recuncho para atoparse todas e todos”. Neste sentido, a directora do centro tamén fixo un anuncio moi especial: a biblioteca coñecerase co nome de “Luís Davila”, o nome do recoñecido artista local que realizou os murais que decoran as paredes.