Universo de contos

A Libraría Abrente, coa colaboración do Concello de Bueu, organiza o programa «Universo de contos», que se desenvolverá todos os mércores dende o 17 de xullo ao 7 de agosto. Este programa, que inclúe diversas sesións de contacontos desenvolverase a partir das 12 horas na explanata enfronte da libraría e, en caso de chuvia, no Estaleiro de Purro.

Organizado polo equipo da Libraría Abrente e coa colaboración do Concello de Bueu, este proxecto está deseñado especialmente para o público infantil, co obxectivo de fomentar a paixón pola lectura desde unha idade temperá. A través da lectura n voz alta e a exploración de temas relevantes, búscase entreter aos nenos e nenas e inspiralos, facer voar a súa imaxinación e axudalos a comprender a importancia das relacións sociais respectuosas e coidado do medio ambiente.

Durante catro sesións temáticas, a cativada descubrirá os tesouros da literatura que celebran valores como a amizade, as emocionantes aventuras, a inmensidade do mar e a importancia do coidado do noso planeta.