Performance «O amor non sempre triunfa»

Co gallo do 25 de novembro, Día da Non Violencia Contra as Mulleres, celébranse diversos actos organizados desde o Centro de Información ás Mulleres de Bueu. Concretamente, o IES Johán Carballeira acolle o 26 de outubro unha performance titulada “O amor non sempre triunfa” ás 11.55 horas.

Esta actividade, dirixida aos centros educativos, ten como obxectivo levar aos máis mozos e mozas a reflexionar sobre as relacións amorosas, a través de ideas como a omnipotencia do amor e a eternidade do mesmo ou o mito da “media laranxa”. A sesión terá unha duración dunha hora e dividirase en dúas partes. Ao comezo, Jorge García Marín, profesor de Socioloxía da USC e experto en xénero, levará a cabo unha disertación explicando a performance e as consecuencias do amor romántico. A continuación, catro persoas levarán a cabo un espectáculo para deconstruír o amor romántico e prever a violencia de xénero.

Desde o departamento local levan traballando durante moitos anos para mudar a sociedade e lograr a igualdade entre homes e mulleres desde a educación. Por iso, nas efemérides do 25 de novembro e 8 de marzo, os grandes protagonistas son os alumnos e alumnas dos centros de primaria e secundaria da vila, a través da convocatoria de diversos certames e de elaboración de declaracións conmemorativas. Así será tamén na programación que se está ultimando e que se dará a coñecer proximamente.