Os tres concellos do Morrazo únense pola cultura cunha nova aplicación de eventos
As concellerías de Cultura de Bueu, Moaña e Cangas estrean BuMoCa, unha nova aplicación creada para reunir nun único espazo a programación cultural e de entretemento dos tres concellos. A plataforma, dispoñible en bumoca.com, nace co obxectivo sinxelo de facilitar que calquera persoa poida saber que ocorre cada día no Morrazo e axudar, ao mesmo tempo, a que asociacións, entidades, programadores e creadores culturais poidan dar maior difusión ás súas actividades.
O nome BuMoCa responde ás iniciais de Bueu, Moaña e Cangas, e resume a filosofía do proxecto: entender o Morrazo como un territorio cultural compartido. A iniciativa conta coa participación das técnicas de Cultura e das concelleiras responsables da área nos tres concellos: Carmen García, Coral Rios e Xiana Abal, de Bueu, Moaña e Cangas respectivamente. Ademais, foi desenvolvida coa colaboración das técnicas dos concellos, Mar Núñez e Cristina Padín.
A aplicación parte dunha necesidade concreta: moitas veces, quen quere asistir a actividades culturais consulta unicamente a programación do seu propio concello e deixa nun segundo plano o que ocorre nos municipios limítrofes. BuMoCa pretende corrixir esa dispersión reunindo toda esa información nunha soa axenda, para que o público poida consultar de maneira rápida que actividades hai en cada data, en que lugar se celebran e a que hora comezan.
Esta visión conxunta permite reforzar a idea da nosa mancomunidade como unha comunidade cultural máis ampla. Cada concello mantén a súa propia programación, pero ao compartila nun mesmo calendario facilítase que a cidadanía poida descubrir máis propostas sen depender de buscas espalladas en redes sociais, páxinas web ou medios diferentes. BuMoCa funciona así como unha especie de mapa común de actividades ao longo de todo o ano.
BuMoCa tamén está pensada para quen crea, organiza ou programa eventos, xa que, ao estar reunida a programación dos tres concellos, asociacións, colectivos, artistas, salas, entidades culturais e programadores poden dar maior visibilidade ás súas propostas e, ao mesmo tempo, consultar que outras actividades están xa previstas. Esta información pode axudar a evitar coincidencias innecesarias entre eventos similares, favorecendo unha programación máis ordenada e beneficiosa tanto para os organizadores como para o público.
No momento da súa presentación, BuMoCa reúne xa 766 eventos publicados, consultables desde o seu propio buscador, unha cifra que permite intuír a enorme actividade cultural e de entretemento que se xera ao longo do ano. A plataforma actualiza diariamente a programación dispoñible e permite incorporar eventos enviados por entidades culturais ou por calquera persoa que queira comunicar unha actividade. As propostas recibidas revísanse antes da súa publicación. Ademais, as concellerías de Cultura dos tres concellos teñen acceso ao calendario e poden engadir directamente os seus eventos.
O proxecto foi desenvolvido por Borja Brun como unha achega ao ecosistema cultural do Morrazo. A idea xurdiu dunha situación cotiá: a dificultade de saber, cada fin de semana, que actividades había realmente no conxunto dos tres concellos. A información existía, pero estaba repartida en demasiados lugares. BuMoCa nace precisamente para ordenar esa información e convertela nunha ferramenta útil, accesible e común.
O nome ten ademais unha chiscadela á memoria local de Cangas. Bumoca foi unha histórica sociedade cooperativa fundada en 1982 e vinculada a un dos primeiros supermercados modernos de Cangas, unha iniciativa na que participou, entre outros, Suso Caramuxo.
As persoas, asociacións ou entidades que queiran enviar eventos para a súa incorporación á axenda poden facelo a través do correo axenda@bumoca.com. Tamén poden remitir as súas propostas ás concellerías de Cultura de Bueu, Moaña ou Cangas.
Con BuMoCa, os tres concellos reforzan a idea de que a cultura, cando se coordina, se comunica ben e se entende como un patrimonio común, faise máis útil para toda a cidadanía.
