Xornada de reducción da sinistralidade no sector da construción

A Fundación Laboral de la Construcción de Galicia celebrará no Concello de Bueu (Pontevedra) o 16 de abril unha nova xornada sobre o proxecto BENSEGURO, dirixido a reducir a sinistralidade laboral no sector. 

Orientada tanto a profesionais da construción como a público xeral interesado en coñecer este programa impulsado pola entidade paritaria e a Xunta de Galicia, a charla informativa terá lugar ás 19.00 horas no 1º andar da Biblioteca Municipal Torrente Ballester do Concello de Bueu. 

O programa da xornada comezará ás 19.00 horas cunha presentación sobre os obxectivos de BENSEGURO, a cargo de Luis Vázquez de Soto, responsable de Seguridade e Saúde de FLC Galicia. A continuación, Mónica Varela Novo, técnica do programa, mostrará exemplos de riscos laborais atopados en obras menores durante as visitas realizadas polo servizo de asesoramento en seguridade e saúde laboral. A charla pecharase cunha quenda de rogos e preguntas.

O proxecto BENSEGURO, pioneiro en España, está dirixido a reducir a sinistralidade laboral no sector da construción, con especial atención ás obras menores, que concentran un maior volume de accidentes.