Gala benéfica pola ELA

• O evento será ás 18.30 horas no Centro Social do Mar e servirá para recadar fondos para o copago de fisioterapia, logopedia e rehabilitación das persoas afectadas

A vila de Bueu acollerá o próximo sábado, 24 de xaneiro, unha gala benéfica pola ELA, que se desenvolverá no Centro Social do Mar a partir das 18.30 horas.

Laura Ogando, concelleira de benestar social e igualdade, destaca que “o obxectivo é dar a coñecer e visibilizar a esclerose lateral amiotrófica, polo que convidamos a toda a veciñanza a que se achegue a colaborar con esta boa causa”.

Pola súa banda, Pilar Guimeráns, dende a asociación Agaela, explica que “todo o recadado nesta gala irá destinado ao copago para fisioterapia, logopedia e rehabilitación das persoas afectadas, xa que actualmente a lei ELA non inclúe estes gastos, polo que seguimos loitando”. Pero tamén “se trata de pasalo ben e celebrar a vida”, aclarou.

A gala contará coas actuacións dos grupos de música tradicional bueueses Retrouso de Cela e A.C. Novos Ventos e da música de Noite Son e Adolfo FH, con algunha sorpresa e sorteos grazas a doazóns de comercios locais. Ademais, a xornalista Raquel Atanes será a encargada de guiar e presentar o acto.

O evento está organizado pola Asociación Agaela e o Concello de Bueu, coa colaboración da Deputación Provincial de Pontevedra e outros comercios privados da vila.

O custe da entrada será de 5.00 €, que se destinarán integramente a Agaela, e todas as persoas que non poidan asistir pero desexen colaborar terán a oportunidade de facelo a través da fila 0. Para a venda de entradas e merchandising, integrantes da asociación estarán o xoves cun posto ao lado da Praza de Abastos de Bueu, no que tamén ofrecerán información sobre a enfermidade.

A Asociación Agaela

A Asociación Galega de Esclerose Lateral Amiotrófica, Agaela, é unha entidade sen ánimo de lucro que opera en todo o territorio galego e que ten como misión visibilizar a enfermidade e as necesidades das persoas que a padecen, mellorar e manter a calidade de vida das familias con ELA mediante programas de atención socio-sanitaria, e fomentar a mellora na calidade asistencial e o acceso a recursos para o colectivo de persoas con ELA. A asociación atende a máis de 160 familias con ELA anualmente, número que se incrementa ano tras ano, e conta con 635 persoas socias.