Agora en Bueu
Imáxes de actualidade
🥇 RECIBIMENTO AOS EQUIPOS INFANTÍS DO BUEU ATLÉTICO BALONMÁN E PRESENTACIÓN DA FINAL 4 DE 2ª AUTONÓMICA
☑️ O salón de plenos do Concello de Bueu acolleu hoxe pola tarde dous eventos nos que o balonmán foi protagonista e, máis concretamente o Bueu Atlético Balonmán. Concretamente, presentouse a Final 4 de 2ª Autonómica, que se celebrará esta fin de semana no Pavillón Pablo Herbello da vila bueuesa, e tamén se recibiu aos equipos infantís do club que veñen de colleitar varios éxitos deportivos.
☑️ Félix Juncal, alcalde de Bueu, que estivo acompañado de concelleiros e concelleiras da corporación municipal, recoñeceu os éxitos deportivos acadados que “estou seguro de que continuarán no futuro”. O rexedor desexou á cativada que “sigades traendo ilusión, felicidade e traballo, porque só así se conseguen os éxitos deportivos e vitais”. E por último tamén quixo poñer en valor o “gran traballo do Bueu Atlético Balonmán, un club cun enorme tecido asociativo e cunha comunidade que é garantía de solidez para o proxecto”.
May 15
💫 O pasado domingo arrancamos as LETRAS GALEGAS en Meiro. A través da colaboración entre a Asociación Veciñal A Morada e o Concello de Bueu, a Casa da Aldea do lugar vibrou coa música de Xavier Blanco e a súa "Literatura afinada", coa Cantarela de Meiro e con Os Palleta Mollada, aos que se uniu a poesía do poeta moañés Dani Costas.
Aquí van algunhas fotiños desa tardiña 📸
May 14
🌸🌹 A pasada fin de semana, alfombristas da vila participaron nas `Xornadas das alfombras do Corpus 2024` e ensináronlles aos nenos e nenas e demais persoas participantes todo o proceso de elaboración das alfombras florais.
Toda unha arte coa que gozaron moito!
Moitas grazas ás persoas alfombristas e ás que vos achegastes a colaborar con nós.
Imos quentando motores para a Festa das Alfombras Florais do Corpus de Bueu, que se celebrará o 2 de xuño.
May 13
🌸🌹 CARTEL DA FESTA DAS ALFOMBRAS FLORAIS DO CORPUS DE BUEU
☑️ A menos dun mes para a celebración, o Concello de Bueu presentou este venres o cartel oficial da Festa das Alfombras Florais do Corpus 2024, nun acto no que estiveron presentes Carmen García, concelleira de cultura, Marc Taeger, artista que deseñou o cartel, e diversos alfombristas.
☑️ O cartel deste ano foi elaborado polo artista local Marc Taeger e reflicte o espírito colaborativo desta festa que conta cunha historia de máis de cen anos de antigüidade, e que foi declarada como de Interese Local no ano 2002 e, desde o 2017, tamén Festa de Interese Turístico Galego pola Axencia Galega de Turismo. Carmen García destacou que “o que queremos é poñer en valor o traballo colaborativo e de unión de todo un pobo ao longo do tempo, motivo polo cal estamos traballando nunha exposición de fotos antigas no adro da igrexa”.
☑️ Marc Taeger explicou que “co cartel búscase homenaxear ás xentes que durante tantos meses traballan na preparación e elaboración das alfombras”. De feito, a imaxe reflicte a diferentes persoas que fan tarefas como recollida da flor e do material, a preparación do mesmo e a confección das alfombras. Para levar a cabo este deseño, Taeger baseouse en fotos antigas grazas ás que tirou a conclusión de que “o importante da festa son as persoas”, e que no cartel se expresan con diversas cores “de xeito que existen moitas interpretacións”.
May 10
📣 PROGRAMA LETRAS GALEGAS 2024
☑️ O Concello de Bueu, a través da concellaría de cultura, presenta un amplo e variado programa para celebrar as Letras Galegas 2024, no que se insiren propostas musicais, cinematográficas e literarias, un concerto da mítica banda Dakidarría ou a tradicional Romaría das Letras de Sanamedio.
☑️ Este mércores ao mediodía celebrouse a rolda de prensa de presentación da programación, na que estiveron presentes Carmen García, concelleira de cultura, mocidade e normalización lingüística, e representantes dos colectivos colaboradores.
☑️ Carmen García salienta que “o que buscamos é poñer en valor a lingua galega en todas as disciplinas artísticas e tamén visibilizar a Luísa Villalta, figura homenaxeada este ano”. Por iso a programación abranguerá todo o mes de maio por diversas localizacións da vila e con atención a varios públicos.
Na web tedes a info completa na web (LIGAZÓN NA BIO)
May 9
🏆 RECIBIMENTO EQUIPO ALEVÍN CLUB DO MAR BUEU 🏆
O Concello de Bueu organizou esta tarde un recibimento oficial ao equipo alevín masculino do Club Do Mar Bueu Simei, que colleitaron un 6º posto no LXXXI Campionato de España de Bateis, celebrado en A Pobra do Caramiñal hai dúas fins de semanas, despois de proclamarse campións do campionato galego. O acto celebrouse no salón de plenos da Casa Consistorial, e nel o alcalde e concelleiros e concelleiras da corporación entregaron uns diplomas aos cativos.
Parabéns a todos eles: Noel Santomé Otero, Darío Moledo Buceta, Bruno Fuentes Malvido, Carlos Iglesias Dos Santos, Iván Rodríguez Juncal, Anxo Novas Loira, Iago Comesaña Leal, Daniel Vilas Chantada, Pepe Freire Couto, Senèn Simes Portas. Ademais, eles viñeron acompañados das rapazas integrantes do equipo feminino.
May 8
🔵 BANDEIRAS AZUIS 2024 🔵
☑️ A Asociación de Educación Ambiental e do Consumidor (ADEAC) vén de anunciar as bandeiras azuis para os areais e centros de España durante esta tempada estival.
☑️ O Concello de Bueu revalida este verán cinco bandeiras azuis, que van para as praias de Area de Bon, Portomaior, Lagos, Lapamán e para a urbana da Banda do Río.
☑️ Así mesmo, a novidade deste ano está na consecución do distintivo de centro azul para o Estaleiro de Purro, na Banda do Río, que se suma aos da Aula da Natureza de Cabo Udra e do Centro de Interpretación de Agrelo.
☑️ Félix Juncal, alcalde da vila, e Silvia Carballo, concelleira de promoción económica e turismo, acollen con ledicia e satisfacción estes galardóns, que supoñen unha mostra do gran traballo levado a cabo na última década, tanto a nivel medioambiental como de implementación de servizos.
☑️ “Cada unha destas bandeiras recíbese coma unha homenaxe ao que é Bueu, e tamén ás súas xentes, pois son referentes dos nosos recursos e do coidado que poñemos en reivindicar o medio ambiente e a nosa historia”, salienta o rexedor da vila bueuesa.
May 8
💫 Correlingua 2024 💫
As rúas de Bueu e a Praza Massó enchéronse este martes coa comunidade educativa da comarca do Morrazo para reivindicar a loita pola lingua galega no Correlingua.
A actriz Isabel Risco foi a presentadora, o alumnado do IES Johan Carballeira leu o manifesto, e Gramola Gominola cantaron e fixéronnos bailar arreo.
Que bo ambiente!
May 7
📣 III Festival Solidario e Artístico Art For Change
Este sábado, o Parque Ramal dos Galos e a Biblioteca Municipal Torrente Ballester vivirán unha xornada artística e solidaria no III Festival Art for Change, organizado polo Concello de Bueu e o IES Johan Carballeira e no que participa a comunidade educativa da vila e diversas asociacións.
Convidámosvos a participar, xa que vai ser unha xornada moi interesante e divertida dedicada á cultura celta.
Aquí vos deixamos o programa ⬇️⬇️
https://concellodebueu.gal/eventos/iii-festival-artistico-solidario-art-for-change/
Abr 26
🐙 XORNADAS DE EXALTACIÓN DO POLBO DE BUEU 🐙
O Concello de Bueu, coa colaboración da Confraría de Pescadores San Martiño de Bueu e a hostalaría da vila, promove as “Xornadas de Exaltación do Polbo de Bueu”, un evento gastronómico e de promoción do produto local que se celebrará do 26 de abril ao 5 de maio e no que participarán trece establecementos culinarios.
Ao longo desa semana, as persoas que se acheguen poderán gozar de arredor dunha vintena de especialidades elaboradas polos restaurantes da vila co polbo como protagonista, dende o tradicional ‘polbo á feira’ ata propostas máis innovadoras.
Na nosa web tedes o programa e toda a info (ligazón na BIO)
Abr 23
🤩 Onte tivemos un "Menú máxico de contos" con Cris de Caldas para culminar o programa "Ler conta moito".
Pequen@s e maiores puideron gozar deste contacontos na Sala Multiusos do Centro Social do Mar, onde houbo adiviñas e roliños de poesía con salsa agridoce, contos diversamente necesarios e outros contados a baixa temperatura.
Abr 23
📣📚 XOSÉ LUÍS MOSQUERA CAMBA E LOIS PÉREZ DÍAZ, GAÑADORES DOS PREMIOS JOHAN CARBALLEIRA
Xosé Luís Mosquera e Lois Pérez Díaz son os gañadores dos Premios Johan Carballeira convocados polo Concello de Bueu. Os xurados, reunidos este luns pola tarde, acordaron conceder o premio na categoría de poesía a Xosé Luís Mosquera coa obra "Trece maneiras de mirar un almanaque"; e a Lois Pérez Díaz coa reportaxe ‘Eloxio do apenovismo’, publicada orixinalmente na revista Luzes.
PARABÉNS!!
Abr 23
☑️ Inma Soto e "Xela, a superheroína de aldea” visitaron este xoves a Biblioteca Municipal de Beluso para deleitar a pequen@s e maiores cunha historia de amor á natureza e ao coidado dos nosos recursos.
☑️ Esta actividade insírese no programa "Ler conta moito" de posta en valor das bibliotecas municipais.
☑️ O luns continuamos co "Menú máxico de contos" de Cris de Caldas, do que poderedes gozar ás 18 horas na Sala Multiusos do Centro Social do Mar.
Abr 19
📣🕹️ Ghallufadas
Xa están as Ghallufadas funcionando nas salas da Piscina Municipal de As Lagoas.
Esta mañá pasaron xa varios grupos de alumnado do CEIP Plurilingüe A Pedra, e xa estiveron xogando cos diversos xogos.
Se vos animades a asistir, lembramos que o evento estará activo durante toda a fin de semana, con charlas e outras actividades para pequen@s e maiores.
📜 Tedes a programación na nosa web e nas historias.
Abr 19
